- Sooruna nunatsinni najugaqartut akiliuteqassanngitsut?
Nunatsinneersunut akiliisitsisoqarneq ajorpoq – naatsorsuutigineqarpoq Namminersorlutik Oqartussanut aamma Kommuninut akileraartarsimanissaq, taannalu aqqutigalugu aserfallatsaaliuinermut pisariaqartinneqartumut tapersiineq pisarpoq. Ukiut 20-t kingulliit Ilulissat kangiata allaffiani suliaqarneq Namminersorlutik Oqqartussanit aamma kommunimit aningaasalersorneqarpoq. Tassa imaappoq kalaallit akileraartartut akilernikuuaat. Nalinginnaasutut isigaarput, takornarissat aserfallatsaaliinermut aningaasaleeqataanissamik ilaserineqarnissaat, takornariaqarnerulertussaaneq eqqarsaatigalugu. Akileraartanngikkaani 10 Euro-mik akiliineq pisassaaq, taanna ataasiarluni akiliuteqarneruvoq piffissaliussallu sinneranut atuuttuulluni. Tamanna aamma takornarianut angallassisartunut avataaneersunut aamma takornarialerisutut sulisunut allanut atuuppoq.
- Ilulissani inunngorpunga aamma inuunerma annerpaartaani maani najugaqarnikuullunga. Maannakkut nunatta avataani najugaqarpunga akiliisalissallungalu. Soormita?
Kommunimit akitsuummik atuutitsilernermi inuit sumi inunngorsimanersut imaluunniit sumi najugaqarsimanersut immikkoortinniarneqarsinnaanngilaq. Immikkoortinniarneqartussaq tassaavoq maannakkut sumi najugaqarneq aamma akileraartarneq. Taamaasillutik kikkut tamarmik tapeeqataassapput – Kalaallit Nunaanni akileraaruteqartarneq imaluunniit isernermi 10 Euro-mik akiliuteqarneq aqqutigalugu – aki naammaginartoq piffissaliussap sinneranut attuuttussaq.
- Sumorpiaq isilernermi akiliuteqartoqartassava?
Ilulissat illoqarfia aamma Ilulissat kangiata akornaniittumi nunami – illoqarfiup killeqarfiata aamma UNESCO-mik eqqissisimatitap eqqaanni. Eqqortumik oqaatigiinnarlugu pingaarnertut pisuffissat pingasuupput, aappaluttoq, sungaartoq aamma tungujortoq, kisianni akornisigut aamma annikitsunik pisuffissaqarput. Taamaammat akiliinissaq pinaveersaartinniarlugu pisuffissat nalunaarsukkat eqqaatigut pisuttoqarsinnaanngilaq. Pisuffissami sungaartumi innaallagissiorfik Nukissiorfiiniit, Cafe Asimiut qaangerlugu akiliuteqarnissaq atuutilissaaq – tassa isumaqarpoq akiliuteqanngikkaluarluni innaallagissiorfimmit Cafe-mut pisuttoqarsinnaavoq.
- Billetsi qanoq sivisutigisumik atuutissava?
10 Euro-mik akiliuteqarneq piffissami pisiarineqarfianit piffissaliussap sinneraniut atuuttussaavoq.
- Aasaanerani isernermi akiliuteqartitsineq piffissami 1. juni - 31. oktober tungaanut atuutissaq – sooruna ukiukkuunngitsoq?
Aap ilumoorpoq, 1. juni 2025-miit aasaanerani akiliuteqartitsineq atuutissaaq. Ukiukkut Sermermiut eqqaannut aamma takornariaqartarpoq kisianni maluginiarnikuuarput piffissami tassani pisuffissap aserfallannera annikinnerusartoq. Amerlanertigut annertuumik apisarpoq taamaasillunilu pisuffissaq apummut tarrittarpoq, ”apummilu pisuffissat” allat tummaatarineqartarlutik. Aamma eqqarsaatigineqarsinnaavoq akiliiffissamik uninngatitsiinarnissamut allaffissornikkut aningaasartuutit imannak annertutigilersinnaammata ukiukkut uninngatinnissaat akilersinnaanavianngitsoq pillugu naliliisariaqarluta, takornariaqarpallaarnavianngimmat.
- Akiliuteqarnermi minutsinut 30-nut Audio Guide-qartoqarsinnaavoq. Tamanna isumaqarpa najukkami takornarialerisumit angallanneqarnissannut inniminniisariaqanngitsunga?NAAMIK – aamma Audio Guide-qarnermut tamanna siunertaanngilaq. Isumassatsialaassooq najukkami takornarialerisumit angallanneqarnissannut iniminniiguit, tassani sillimaniarneq aamma attaveqaqatigiinnissaq pingaartinneqartarpoq. Audio Guide Nunarsuarmiunut kingornutassiaqarfiit allaffiani ilisimatitsinissatsinnut pisussaaffitta ilaatut isigineqaannassaaq.
- Billetsimik nakkutilliisumik aggertoqassava?
Ilulissat kangiata allaffiani sulisut, Park Rangers aamma Site Manager, sumiiffimmi ataavartumik nakkutilliiartortassapput. Taamaammat akiliuteqartarfimmit billetsiutit imaluunniit internet aqqutigalugu pisiavit allagartaa mobilinniittoq takutissavat.
- Billetsisivunga – taanna aamma Kangiata Illorsuanut atuuppa?
Naamik. Ilulissat kangiata allaffia aamma Kangiata Illorsua suliffiupput assigiinngitsut, suliffiillu taakku marluk immikkut billetsimik pisiffigineqartussaapput.
