Kangianut aqqutissat
Ilulissat Kangiani eqqissisimatitap eqqaa annertuvoq tikikkuminaallunilu aqqusineqanngitsoq illoqaranilu. Kangerluulli ilaa Ilulissanut qaninnerpaaq kikikkuminarpoq.
Aqqusineqanngilaq
Eqqissisimatitap eqqaata annersaa qaqqaqarfiuvoq inoqanngitsoq. Eqqissisimatitap eqqaa illoqarfimmut qanineq aqqusineeqqanik pisuttarfeqarpoq. Angallannerit tamarmik pisulluni, umiatsiarluni il.il. qulimiguulimmilluunniit ilaalluni, ikiukkullu qimussimik sisoraatinilluunniit.
Immatigut angalaneq
Ukioq kaajallallugu kangerluup paavani immatigut angalaneq nalinginnaasumik pisinnaasarpoq inerteqqutaananilu. Ukiukkulli issilluartillugu taamaaliortoqarsinnaaneq ajorpoq Diskup Tunuata sikusarnera pissutigalugu. Inuussutissarsiutigalugu aalisartut piniartullu kisimik Kangerlummi ilorpasinnerusumut angalaqqusaapput. Iluliarsuit kanillugit umiatsiarneq ulorianarpoq, sillimaniarnerlu eqqarsaatigalugu minnerpaamik ilulissap portussusaata quleriaataasut ungasitsigisumiittoqartarnissa innersuussutigineqarpoq.
Qulimiguulimmik iigartartumut
Ilulissat Kangiata qinnguani iigartartorsua misigerusukkaanni
qulimiguulik kisimi periarfissaavoq. Iigartartup saavata sermersuullu
eqqaani mittarfimmut angalatitsisoqartarpoq. Tassanilu malugeqquneqarpoq
eqqissisimatitamut qulimiguulimmik angalanerit allat tamarmik immikkut
ittumik akuersissuteqaqqaartassammata.
Sermersuaq iigartartorlu
Ilisimatusarluni angalanerit assigiinngitsut ilaatigut sermersuaq itivereerlugu Ilulissat Kangiata nalaatigut tikittarput. Taamatut iliorneq immikkut ittumik akuersissuteqaqqaarlunilu sillimmaserneqaqqaarsimassaaq Ilulissallu eqqaani nunamik ilimannilluarnermik sikumilu angalasinnaanermik pisariaqartitsilluni. Iigartartup “sulinerujussua” pissutigalugu Sermeq Kujalliup iigartartuata eqqaani angalaneq periarfissaqanngilluinnarpoq. Iluliarsuarnut sikunullu saatsersunut (ingerlaartunut) qaqineq inuunermut navianarpoq.
