UNESCO-mut alakkaaneq akeqalissaaq
Akiliuteqarneq piffissami Ilulissanut tikeraarsimaneq tamakkerlugu atuuttassaaq, pisuttuarfinnik ikaartarfiusanillu aserfallatsaaliinermut ulluinnarnilu nakkutilliinermut tapertaassallutik. Akiliuteqarnermut ilanngullugu tikeraat periarfissaqartassapput audioguide-mik 30 minutsinik atuisinnaanermik, tamaani pinngortitap kulturikkullu oqaluttuassartaanik oqaluttuartumik.
Soormi akeqalersitsisoqarpa?
2004-imili Nunarsuarmiunut kingornussarsiarititamut allaffik kommunimi akileraartartut aningaasalersorsimavaat. Taamaalilluni periarfissaqarsimavoq paasissutissanik sanaartorneq, pisuttuarfinnik nalunaaqutsersuineq, ikaartarfiusanik pilersitsineq kiisalu Park Rangers-inik atorfinitsitsineq eqqiluitsuutitsineq torersuutitsinerlu akissaqartinnissaat.
Takornariat amerliartornerat ilutigalugu isumaqarpugut pissusissamisoortoq, tikeraat aamma nuna nunarsuarmiunut kingornussarsiaritinneqartup nalissaqanngitsumik pinnissusillip illersorneqarneranut aningaasalersueqataappata.
Akiliuteqartitsineq Ilulissat qanittuani nunamut atuuppoq
Erseqqissassallugu pingaaruteqarpoq, akiliut Site Fee nunatamut Ilulissat illoqarfiata aamma Ilulissat kangerluata – Kangiata - akornanniittumut tamarmut atuutissammat – tassa pisuttuarfiinnaanngitsut. Tamanna isumaqarpoq, akiliinissaq piumasaqaataassammat, apeqqutaatinnagu pisuttuarfiit aqqusiorneqarsimasut atuarlugit tamakkuluunniit avaqqullugit angalasoqaraluarpat.
