Angalanissamut aningaasartuutinut aammalu pisariaqartumik ineqarnissamut tapiissutinut qinnuteqarit

Akeqanngitsumik angalaneq immikkut tapiineruvoq, taannalu ilinniagaqarnersiuteqaruit qinnutigisinnaavat.

Akeqanngitsumik angalanerit assigiinngitsut ukuupput:

• Ilinniarluni aallartinnermi aamma ilinniakkap naammassinerani
• Ilinniakkamik unitsitsineq imaluunniit iliniakkanik unitsitsigallarneq
• Ukiumut ataasiarluni atuanngiffeqarnermi angalaneq aamma/imaluunniit juullisioriarneq.
• Ernereernermi sulinngiffeqarneq
• Ilinniakkamut atatillugu angalaneq
• Qanigisanik peruluttoorneq toqusoornerlu

Ilinniartutut piumasaqaatit naammassisimagukkit akeqanngitsumik angalanernut assigiinngitsunut pisinnaatitaaffeqarputit.

Tamakkiisumik angalanissamut aningaasartuutinut aammalu pisariaqartumik ineqarnissamut tapiissutinut matussutinut aningaasaliiffigitinniaruit ima inissisimassaatit:

• Ilinniagaqarnersiutisisassaatit
• Pisortanit ikiorsiissutisisannginneq

Ukununnga aningaasaliiffigitissinnaavutit:

• Piumasaqaataasumik ungasissumiit atuartitsinerni modulinut ingerlanneqartut
• Specialinik pingaarnertullu suliassanik piumasaqaataasunik suliaqarneq ilinniakkani ingerlariaqqiffiusuni
• Ilinniarnermik aaqqissuussineq naapertorlugu piumasaqaataasumik angalalluni ilinniariartussaatitaaneq
• Ilinniakkamut naapertuuttumik qaammat ataaseq sinnerlugu sivisussuseqartumik sungiusarluni sulisimaneq
• Ilinniakkamut naapertuuttumik ilinniarfimmi allamiinnerit qaammat ataaseq sinnerlugu sivisussuseqartumik, ilinniarfimmilu allamiinnissaq ilinniakkami piumasaqaataappat ilinniakkallu aaqqissugaanerani nalunaarsorneqarsimappat imaluunniit ilinniakkamut pineqartumut naleqqiullugu immikkut naleqartinneqarneq
• Ilinniagaqalernissamut pinngitsoorani misilitsissimanerit
• Sakkutooqarnermut ilinniagaqarnermi tigusaanissamut misilitsinneq
  
  

Aningaasartuutit tamarmik ilitsersuussisumit akuerisaareertariaqarput.

Eqqumaffigiuk aningaasartuutit ilaat ilinniarnermi ataasiaannaq atorneqarsinnaasarmata.

Kalaallit Nunaanni Kalaallillu Nunaata avataani ilinniarfimmiinnermi aningaasartuutinut pisariaqartunut tapiissutit aalajangerneqassapput, ilinniarfimmiinnermi qaammammut aningaasartuutinit annerpaamik 10.000 kr-iussallutik, taamaasilluni ilinniarfimmiinnermi aningaasartuutit:

1) 4000 kr-ip tungaanut 100%-ii matussuserneqartarput aamma
2) 4000 kr-it sinnerlugit 75%-ii matussuserneqartarlutik

Angalanissamut aningaasartuutinut aammalu pisariaqartumik ineqarnissamut tapiissutinut qinnuteqarniaruit, qinnuteqaatit qarasaasiakkut nassiussinnaavat nammineerluni sullittarnermi, nittartakkap qulaatungaani ”Akiliunneqarnissamut maana qinnuteqarit”-mik allaqqasumi. Nammineerluni immersuiffissamut aaqqiissutissaq atorniarukku nammineerlutit MitID-risat atorlugu qarasaasiamut isissaatit.

Qinnuteqarnermi ilanngussat ilaasussat:

• Ilinniarfimmiit ilitsersuussisumit imaluunniit immikkoortortaqarfimmi aqutsisumit akuerineqareersimanermut uppernarsaat.
• Angalanermut ineqarnermullu missingersuut.

Toortakkap ”Akiliunneqarnissamut maana qinnuteqarit” toorneratigut qarasaasiakkut nammineerlutit immersuiffissamik immersuillutit aallartissaatit.

Malugiuk:
Qinnuteqaatigisat qarasaasiaq atorlugu nassiunniaruku MitID atorlugu qarasaasiamut isersinnaaguit aatsaat nassiussinnaavat.

Akeqanngitsumik angalanermut qinnuteqarniaruit qinnuteqarniarnermut immersuiffimmut immersueqqaassaatit.
Toortakkap sungaartup ”Akiliunneqarnissamut maana qinnuteqarit”  atorneratigut imaaliorsinnaavutit:

• "Anisiguk" toqqassavat qinnuteqaat anisinniarukku, assannik immersorniarukku tunniunniarukkulu (MitID-qarnissaq pisariaqanngilaq).

Immersugassaq immersoreernikoq ilinniarfinnut tunniussavat, ilinniarfiit iloqarfimmi allamiippat immersugassaq piffimmi Majoriaq-mut tunniussinnaavat.

Eqqaamallugu ilanngussassat ilaasussat/nassiuteqataasussat ilanngussallugit:

• Ilinniarfimmiit ilitsersuussisumit imaluunniit immikkoortortaqarfimmi aqutsisumit akuerineqareersimanermut uppernarsaat
• Angalanermut ineqarnermullu missingersuut

Illit (ilinniakkamik qinnuteqartoq) angalanissamut aningaasartuutinut aammalu pisariaqartumik ineqarnissamut tapiissutinut qinnuteqarsimaguit ilinniarfivit qinnuteqaat tigussavaa aalajangiiffigalugulu.

Akuersissuteqarfigineqarnermi
Qinnuteqaatit akuerineqassappat illit (ilinniartoq) akuersissutip allaqqaneranik tigusaqassaatit.

Itigartitaanermi
Qinnuteqaatit itigartitsissutigineqarpat (ilinniagaqartoq) allagarsissaatit naammagittaalliorsinnaanermut ilitsersuut ilanngullugu.

Ullormik killerititaasumik tunniussiffissaqanngilaq.

Qinnuteqaatit pillugu ilinniagaqarfipput aalajangiinera pillugu maalaaruteqarnissamut pisinnaatitaaffeqarputit.

Maalaarummik nassiussissaguit tamanna pissaaq aalajangiinerup tiguneqarneranit sapaatit akunneri arfinillit qaangiutsinnagit.
Maalaarut mail atorlugu nasssiussinnaavat IKIN@nanoq.gl

Maalaarutinni ima isiussaatit:

• Maalaaruteqarninnut tunngavigisatit allakkit
• Uppernarsaatitut ilanngussassat ilanngutikkit, assersuutigalugu itigartitsilluni allagaq

• Akiliunneqarluni angalaneq
• Meeqqap akeqanngitsumik angalanissaanut qinnuteqaat