Pisortat neqeroortitsinerat

Pisortani ingerlatsisoq suliassamik nammineq suliarisinnaanngisaminik imaluunniit suliarerusunngisaminik suliakkeerusukkuni, neqeroortitsineq atorneqarsinnaavoq. Assersuutigalugu pisortat aningaasaataannit suliffeqarfissamik sanaartorniarnerusinnaavoq, kisiannili aamma suliffeqarfimmik ingerlatsinerusinnaavoq imaluunniit suliffeqarfimmut pequtinik tunniussinerusinnaalluni.

Pisortani ingerlatsisup pisiniarnissaminik siunertaqarnerminik tamanut saqqummiussineratigut neqeroortitsineq aallartinneqartarpoq.
Pisortani ingerlatsisoq neqeroortitsiniarnerminik nalunaarummik, Govgen.gl-imi tamanut saqqummiunneqartussamik immersuissaaq.
Neqerooruteqartitsinermi suliassamik nassuiaat sumi takuneqarsinnaanersoq imaluunniit sumi piniarneqarsinnaanersoq neqeroortitsiniarnermik nalunaarummi aamma allassimassaaq.

Neqerooruteqartitsinermi suliassamik nassuiaat suliassaq pillugu tunngaviusumik paasissutissanik, soorlu piumasaqaatit pillugit nalunaarsuiffimmik, neqeroortitsinermi piumasaqaatinik, piukkunnassutsimut piumasaqaatinik, suliakkiinissamilu piumasaqaatinik imaqartuaannassaaq.

Neqeroortitsinerit nassiussinnaassagukku quppernermi uani immersugassaq immersussavat.

Neqeroortitsinermik nassitsineq akeqanngilaq.

Suliffeqarfiup imaluunniit ingerlatsiviup neqeroortitsiniarnera tamanut saqqummiussinnaaqqullugu, immersugassaq immersorneqassaaq.

Neqeroortitsinissamik nassitsiniaruit quppernerup uumap aallaqqaataata nalaani imminut sullinnissamut toortagaq sungaartoq ”Neqeroortitsinermik ikkussigit” aqqutigalugu nassiussinnaavat. Imminnut sullinnissamut periarfissaq atorniarukku MitID Erhverv-imik isissaatit.

Neqeroortitsiniarnermik ikkussiguit, nassiunnialerukkulu uku ilanngussatut ilanngullugit nassiutissavatit:

• Neqeroortitsineq pillugu paasissutissat Govgen.gl-imi tamanut saqqummiunneqartussat.
• Neqerooruteqartitsinermi suliassamik nassuiaat suliassaq pillugu tunngaviusumik paasissutissanik, piumasaqaatit pillugit nalunaarsuiffimmik, neqeroortitsinermi piumasaqaatinik, piukkunnassutsimut piumasaqaatinik, suliakkiinissamilu piumasaqaatinik imalik.
• Neqerooruteqartitsinermi suliassamik nassuiaat sumi takuneqarsinnaanersoq imaluunniit sumi piniarneqarsinnaanersoq

Malugiuk:
MitID Erhverv-ernik iseruit aatsaat neqeroortitsinerit digitalikkut nassiussinnaavat.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup neqeroortitsissut nassiussaq tiguguniuk, Inuussutissarsiutinut Immikkoortortami sullissisussamut ingerlateqqinneqassaaq.

Nassiussavit tiguneranut uppernarsaat mailikkut tigujumaarpat.

Neqeroortitsinissaq pillugu nassiussaq amigaateqarnersoq imaluunniit kukkuneqarnersoq misissorneqassaaq. Nassiussaq tamakkiisuuppat, neqerooruteqartitsinermi suliassamik nassuiaat ilanngullugu piaartumik Govgen.gl-imi tamanut saqqummiunneqassaaq.

Govgen.gl-imi neqeroortitsinermut qupperneq Inuussutissarsiornermut Immikkoortoqarfiup ataavartumik nutartertassavaa.
Neqeroortitsinermi ajugaasut tassani aamma tamanut saqqummiunneqartassapput.

Neqeroortitsineq nassiunneqareersoq allannguiffigerusukkaanni, tamanna Naalakkersuisoqarfimmut saaffiginninnikkut pisinnaavoq.

Allannguutit Inuussutissarsiornermut immikkoortoqarfimmut isiin@nanoq.gl maileruteqarnikkut pisinnaapput.

Malugalugu:
Neqeroortitsinerup ilisarnaataa (ID) sorleq allanngortinniarneqarnersoq paasissutissiissutigilaariuk.

Tunngavilersukkamik patsisissaqartillugu neqeroortitsineq taamaatissinnaavat.
Tunngavilersukkamik patsisit tassaasinnaapput:

• Neqerooruteqartitsinermi suliassamik nassuiaat imaluunniit neqeroortitseriaaseq annertuumik kukkuneqarpat
• Aningaasaliissutinut tunngassuteqartumik suliakkiisoq isumaqatigiissusiorsinnaanngippat
• Neqeroortitsissutigineqartoq naleqqutinngitsoq suliakkiisup paasilerpagu
• Suliakkiisoq neqeroorutinik akuerineqarsinnaanngitsuinnarnik tigusisimaguni imaluunniit piukkunnartussarsiornissaq pillugu akuerineqarsinnaanngitsumik noqqaaffigineqarsimaguni.

Taamaatitsinerup kingorna piaartumik, kingusinnerpaamillu ullut pingasut qaangiuppata piukkunneqarnissaminnik qinnuteqarsimasut imaluunniit neqerooruteqarsimasut tamaasa taamaatitsinermik, tassungalu patsisaasumik ilisimatissavatit.

Ukioq naallugu qinnuteqarsinnaavutit.

Tulliuttumi inatsisinik unioqqutitsinerit pillugit maalaarutit Neqerooruteqartitsinermi maalaaruteqartarfiup suliarisarpai:

• Pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaat nr. 6, 12. juni 2019-imeersoq (neqeroortitsinermut inatsit)
• Neqerooruteqartitsisarneq pillugu Inatsisartut inatsisaat nr. 11, 2. december 2009-meersoq

Kikkulluunniit maalaaruteqarnissaminnut inatsisitigut soqutigisallit Neqerooruteqartitsinermi maalaaruteqartarfimmut maalaaruteqarsinnaapput, soorlu assersuutigalugu:

• Suliffeqarfiit suliassamut neqerooruteqarsimallutik suliassamik pissarsinngitsut
• Malittarisassat naapertorlugit neqeroortitsineq pisimagaluarpat, suliffeqarfiit suliassamut qinnuteqartuusimasinnaasut imaluunniit neqerooruteqartuusimasinnaasut imaluunniit pilersuisimasuusinnaasut

Neqerooruteqartitsinermi maalaaruteqartarfik pillugu annerusumik paasisaqarsinnaavutit uani:

Neqerooruteqartitsineq | Atuisartoqarnermut Unammilleqatigiinnermullu Aqutsisoqarfik