Inatsisit naapertorlugit ingerlatsivinnut Digitalimik Allakkerineq
Pisussaajunnaarsitsinissamut maana qinnuteqaatPaasissutissat nalinginnaasut
Suliffeqarfiit pisortaqarfiillu Kalaallit Nunaanniittut pisortaqarfinnit digitalimik allagarsisartissaapput.
Suliffeqarfiit digitalimik allagarsianik pisussaajunnaarsinneqarnissamut qinnuteqarsinnaapput. Qinnuteqaat tunngavilersorneqassaaq.
Qinnuteqarnissamut piumasaqaatit
Pisortani Digitalimik Allakkerineq pillugu Inatsisartut inatsisaanni § 4-mi imm. 8-mi allassimasut malillugit allakkatigut tunngavilersuilluni atsiornikkut pisussaajunnaarsinneqarneq pisinnaavoq. Pisussaajunnaarsinneqarnissamut tunngavilersuutit immikkuullarissuusariaqarput.
Immikkuullarissutut taaneqarsinnaavoq suliffeqarfik internetimut attaveqarsinnaannginnera. Taamaattoqassappat aamma uppernarsaasersorneqartariaqarpoq suliffeqarfik internetimut attavilersinnaanngitsoq.
Suliffeqarfiit digitalimik allagarsianik pisarunnaarnissaannut tunngavissat immikkuullarissutut taasat annikitsuaraapput. Tassami naatsorsuutigineqarpoq suliffeqarfiit suleqatigisartakkaminnik attaveqarnissaminnut internetimik pisariaqartitsinissaat.
Taamaakkaluartoq suliffeqarfiit ataasiakkaat interneteqanngikkaluarlutik sumiiffiit ilaanni ingerlatsisinnaapput. Taakkualu pisussaajunnaarsinneqarnissaminnut periarfissaqassapput. Taamaattoqassappallu tamanna tunngavilersuutigineqartariaqarpoq.
Attaveqaatitigut qinnuteqaatit nassiunniarukku (MitID-eqaruit)
Pinerlunniartoqarsinnaanera pinaveersaartinniarlugu, atsiorsinnaasutut qinnuteqartitaq CVR-imi nalunaarsuiffimmi allassimassaaq, namminerlu MitID-ni atorlugu qinnuteqassalluni, suliffeqarfimmilu atsiorsinnaanini uppernarsassallugu.
Una toorlugu pisortaqarfik suliffeqarfilluunniit pisortaqarfinnit allakkanik digitaliusunik pisussaajunnaarsinneqarnissaanut qinnuteqartoqarsinnaavoq.
Qinnuteqaatit ornigullutit tunniukkiartorniarukku (MitID-eqanngikkuit)
Pisortaqarfimmi suliffeqarfimmiluunniit sulisoq atsiorsinnaatitaasoq, pisortaqarfinnit allakkanik digitaliusunik pisussaajunnaarsinneqarnissamut tunngavilersuilluni allakkatigut tigussaasumik qinnuteqassaaq.
Suliffeqarfiup pisortaqarfiulluunniit pisussaajunnaarsinneqarnissamut qinnuteqaammini ataani allassimasut ilanngutissavai:
- Pisussaajunnaarsinneqarnissaminut tunngavilersuinissaq
- Tunngavilersuilluni qinnuteqaat suliffeqarfik pillugu atsiorsinnaasoq atsiorsimassaaq
Qinnuteqaat tunngavilersugaq allaganngorlugu uunga nassiunneqassaaq:
Digitalinngortitsinermik Aqutsisoqarfik
Imaneq 1
3900 Nuuk
Suliamut ingerlatseriaaseq
Suliffeqarfiup qinnuteqaataa akuerineqarpat, taava pisortanit digitalimik allagarsisarunnaarlutit allakkanik tigussaasunik nassinneqartalissaatit.
Tassunga tunngatillugu suliffeqarfiup qulakkiissavaa suliffeqarfik allakkanik tigussaasunik nassinneqarsinnaanissaa. Suliffeqarfiup misissortariaqarpaa allakkat najukkamut apuunneqartarnersut imaluunniit allatigut pissarsiarineqartariaqartassanersut.
Suliffeqarfiup qinnuteqaataa itigartitsissutigineqarsimappat, taava Digitalinngortitsinermut Aqutsisoqarfimmit allakkamik nassinneqassaatit.
Piffissaliussat
Qinnuteqaat Digitalinngortitsinermut Aqutsisoqarfimmut tunniutereerukku piffissaq sivitsunngitsoq akissutisissaatit.
Pisussaajunnaarsinneqarnerup sivisussusaa
Suliffeqarfik pisortaqarfilluunniit Allakkanut Digitaliusunut pisisussaajunnaarsinneqarnera piffisalersugaavoq.
Ukiup tulliani novembarip aallaqqaataa akuersissut atorunnaassaaq.
Suliffeqarfik Kalaallit Nunaanni ingerlanneqarunnaassagaluarpat pisussaajunnaarsinneqarnermut akuersissut killeqanngitsoq tunniunneqassaaq.
Suliffeqarfiup pisussaajunnaarsinneqarnissamut akuersissutigisaminik taamaatitsiniarluni qaqugukkulluunniit Digitalinngortitsinermut Aqutsisoqarfik saaffigisinnaavaa.