Pingaartumik angisuut

Eqqagassanik eqqaaneq
Eqqagassatit angisuut qanoq ilillutit igissinnaaneritit pillugit sumi najugaqarnerit aallaavigalugu assigiinngitsunik maleruagassaqarpoq:
• Nuuk: Eqqagassat angisuut ukiumut marloriarluni, upernaakkut aamma ukiakkut saliinermut atatillugu katersorneqartarput. Eqqagassat angisuut ullormi aallerfiusussami kingusinnerpaamik nal. 7.00 aqquserngup killinganut inississavatit. Nuummi eqqagassat angisuut ingerlaavartumik tigooraavimmut/atoqqinneqartussanut inersuarmut aamma tunniussinnaavatit
• Kapisillit aamma Qeqertarsuatsiaat: Eqqagassat angisuut ukiumoortumik upernaakkut saliinermut atatillugu ataasiarlutik katersorneqartarput. Nunaqarfimmi eqqakkanut tigooraavimmut aamma eqqagassatit angisuut tunniussinnaavatit
• Paamiut, Arsuk, Tasiilaq, Sermiligaaq, Isortoq, Kulusuk, Tiniteqilaaq aamma Kuummiut: Eqqagassat angisuut qaammammi aputeqanngiffiusumi ataasinngorneq siullermi katersorneqartarput. Eqqagassat angisuut aamma illoqarfimmi/nunaqarfimmi eqqakkanut tigooraavimmut ingerlaavartumik tunniussinnaavatit
• Ittoqqortoormiit: Eqqagassat angisuut Ittoqqortoormiini katersorneqarneq ajorput. Taarsiullugu eqqagassat angisuut illoqarfiup eqqakkanut tigooraavianut tunniussinnaavatit