Najukkami radioqarfinnut aamma tv-qarfinnut tunngaviusumik tapiissutit - Qinnuteqarneq

Inooqataanermi kulturikkullu pingaartitsinerit pissutigalugit najukkami radioqarfiit aamma tv-qarfiit atatinnissaat Namminersorlutik Oqartussat soqutigisaraat. Namminersorlutik Oqartussat taamaattumik tapiissuteqarnernik aaqqissuussinernik pingasunik pilersitsisimapput:

• Najukkami radioqarfinnut aamma tv-qarfinnut tunngaviusumik tapiissutit
• Najukkami tv-qarfinnut aallakaatitassiornermut tapiissutit
• Ilinniaqqinnernut aamma ingerlaqqiffiusumik ilinniagaqarnernut najukkami radioqarfinni aamma tv-qarfinni sulisunut tapiissutit

Tapiissuteqarnermik aaqqissuussinerit Nunatsinni Tusagassiutilerisut Kattuffiat, NTK-miit agguaanneqartarput.

Tunngaviusumik tapiissutit
Tapiissutit NTK-mi ilaasortaasumit najukkami radioqarfimmit aamma tv-qarfimmit qinnutigineqarsinnaapput. Tapiissutit najukkami radioqarfiup aamma tv-qarfiup ingerlanneqarneranut atorneqassapput.

Tunngaviusumik tapiissutit aningaasaliissutigineqassapput siumoortumik aningaasanik immikkoortitsinikkut tassalu najukkami aallakaatitsiviit nutaat marluk tapiissutinik pissarsisinnaalerlutik siullermeertumik kvartalikkaartumik tunniussisoqareerneratigut tapiissutinik pissarsisinnaanermut piumasaqaatit eqquutsinneqarsimappata.
Najukkami aallakaatitsiviit marlunnit amerlanerusut qinnuteqareernermikkut aningaasanik immikkoortinneqareersunik pisinnaappata aallakaatitsiviit marluk tunngaviusumik tapiissutinik tunineqarnissamut piumasaqaatinik naammassinneqqaartut kisimik tapiiffigineqassapput. Tunngaviusumik tapissutit sinneri agguaanneqassapput najukkami radiukkut tv-kullu aallakaatitsiviit tapiiffigineqarsinnaasut sinnerisa akornanni amerlaqatigiinnik.

Najukkami tv-qarfinnut aallakaatitassiornermut tapiissutit aamma Ilinniaqqinnernut aamma ingerlaqqiffiusumik ilinniagaqarnernut najukkami radioqarfinni aamma tv-qarfinni sulisunut tapiissutit pillugit allaaserinninnerni attuumassuteqartuni annertunerusumik atuarsinnaasi.


Malugiuk
Najukkami radioqarfimmik imaluunniit tv-qarfimmik nutaamik aallartitsinissamut Namminersorlutik Oqartussaniit tapiissutinik qinnuteqarsinnaanngilasi.

Tunngaviusumik tapiissutinik qinnuteqarniarussi, aallakaatitsivik:

1) aallakaatitsisinnaanermut akuersissummik atuuttumik peqassaaq.
2) missingersuutit, naatsorsuutit kukkunersiuisoqarnerlu pillugit maleruagassiaat eqquutsissavai.
3) aallakaatitassiornermik ingerlatsinermut uppernarsaatit pillugit maleruagassiaat eqquutsissavai.
4) sumiiffimmi innuttaasut sumiiffimmi nutaarsiassanik ilisimatittassavai.
5) sumiiffimmi innuttaasut oqaaseqarnissamut periarfissaqartissavai.
6) aallakaatitassiornermik ingerlatsinermini ilaatigut aallakaatissavai siammartissallugilluunniit aallakaatitassiat aaqqissorneqarsimasut, aallakaatitsiviup nammineerluni suliai imaluunniit aallakaatitsiviup aallakaatitassiornermik ingerlatsivinnik allanik suleqateqarluni pingaarnertut aallakaatitassiortuulluni suliai (nammineerluni aallakaatitassiat). Aallakaatitseqqiinerit, ussassaarutit aallakaatitassiallu aaqqissorneqarsimanngitsut nammineerluni aallakaatitassiatut isigineqanngillat.
7) aallakaatitassianik meeqqat ukiukinnerit timikkut, tarnikkut ileqqorissaarnikkulluunniit ineriartornerminni annertuumik ajoquserneqaatigisinnaasaannik, matumani pingaartumik aallakaatitassianik atoqatigiinnermut tunngasunik imaluunniit pissuteqanngivilluni nukersornermik imaqartunik aallakaatitsisoqannginnissaa qulakkiissavaa. Ilanngutassiat sakkortuumik nukersornermik imaqartut imaluunniit isiginnaagassat kanngunartut pillugit aallakaatitsivik tusarnaartartunut isiginnaartartunullu mianersoqqusisassaaq.
8) aallakaatitassianik ammip qalipaataanik, arnaanermik/angutaanermik, upperisamik, sumit naggueqarnermik, nunamit suminngaanneernermik, politikkikkut isummanik anguteqammilluunniit/arnaqammilluunniit atoqateqartartuunermik pissuteqartumik qinngarsuilernissamut aqqutissiueqataasinnaasunik aallakaatitsisoqannginnissaa qulakkiissavaa.

Qaammatit tamaasa kingusinnerpaamik 5-iani aallakaatitsiviup tapiissutinik pissarsisimasutut qaammammi qaangiuttumi aallakaatissimasaminut nalunaarsuiffini nassiutissavaa. Aallakaatitassiakkaartumik nalunaarsorneqassapput:

• aallakaatitap taaguutaa
• minutsinik qassinik sivisussuseqarsimanera
• oqaatsit
• imarisai

najukkami nutaarsiassanut aamma aallakaatitassianullu.

Aammalu nalunaarsorneqassapput minutsinut qaammami pineqartumi nammineerluni aallakaatitassiat, nipilersuutit atorneqartut, pilerisaarutit aamma taamaattoqassappat satellit-ikkoortumik tv-mi radiumiluunniit aallakaatinneqarsimasut.

Qinnuteqarneq akeqanngilaq.

Tunngaviusumik tapiissutinik qinnuteqaateqarniarussi qinnuteqarnissamut immersuiffissamik immersuissaasi.

Qinnuteqarnissamut immersugassaq immersoriarlugu allanik pappialanik pisariaqartunik kakkiussillusi NTK-mut nassiussissaasi.

Una toorlugu aallakatitassiornermut tapiissutinik qinnuteqarnermi immersugassaq aasinnaavarsi.

Malugiuk
Qinnuteqaatit fax-ikkut nassiussinnaanngilasi.

Qinnuteqarnissamut piffissaliussap kingorna qaammatip ataatsip missaani qinnuteqaatissinnut akissutisissaasi.

Tapiissutit ataatsimoortut tigusasi, ullorsiutit ukiuanni qaangiuttumi minnerpaamik 150.000 kr.-iusimappata, naatsorsuutit kukkunersiuisumit nalunaarsugaasumit imaluunniit naalagaaffimmit akuerineqartumit kukkunersiorneqarsimassapput.

Tapiissutit ataatsimoortut tigusasi, ullorsiutit ukiuanni qaangiuttumi 150.000 kr.-init annikinnerusimappata, naatsorsuutit nammineq kukkunersiuisumit imaluunniit kukkunersiuisumit nalunaarsukkamit kukkunersiorneqarsimassapput.

Naatsorsuutillu aamma akuerineqarsimallutillu atsiorneqarsimassapput siulersuisunit tamarmiusunit aammalu kukkunersiuisut nalunaarutaat ilanngunneqarsimassalluni.

Aallakaatitsivinnut pioreersunut qinnuteqarnissamut piffisaliussaavoq ukiumi qinnuteqarfiusumi januarip 5-iani.

Aallakaatitsivinnut nutaanut qinnuteqarnissamut piffissaliussaavoq kvartalip iluanni qaammammi siulliup 5-iani, kisianni aatsaat kvartalimi tulliuttumi tunngaviusumik tapiissutit tunniunneqarsinnaapput.

Aalajangiinerit uku Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmut naammagittaalliuutigineqarsinnaapput:

• Tapiiffigineqarnissamik qinnuteqaammut itigartitsineq
• Tapiissutit unitsinneqarneri pillugit aalajangiinerit
• Tapiissutit tamakkiisumik ilaannakuusumilluunniit utertillugit akilerneqarnissai
• Pikkorissarnerni peqataanissaq pillugu qinnuteqaatip itigartinneqarnera
  
  

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmit aalajangiinerit allaffissornikkut oqartussanut allanut naammagittaalliuutigineqarsinnaanngillat.

• Aallakaatitsinissamut akuersissut - Qinnuteqarneq
• Najukkami tv-qarfinnut aallakaatitassiornermut tapiissutit - Qinnuteqarneq