Qaleralinniarnermi angallatinut pisassiissutit nammineq pigisat

Raajarniarneq, avataasiorluni Kitaani Tunumilu qaleralinniarneq, assagiarsunniarneq kiisalu sinerissap qanittuani aqutsiveqarfinni Qeqertarsuup tunuani, Upernavimmi Uummannamilu qaleralinniarneq Pisassiissutit Niuerutigineqarsinnaasut Nammineq Pigisat (PNNP-it) atorlugit aqunneqarput. Malugeqquneqarpoq Qeqertarsuup tunuani, Upernavimmi Uummannamilu angallatinut 6 meteriniik naannerusunut (umiatsiaaqqanut) PNNP-imi peqataaniarnerlutik aalisartut nammineq aalajangersinnaagamikku, angallatinulli 6 meterinik takinerusunut PNNP-imik aalisarneq piumasaqaataalluni.

PNNP isumaqarpoq pisassat nammineq pigineqartut niuerutigineqarsinnaasullu. Pisariaqartitatit naapertorlugit pisassiissutit nammineq pigisat ilaannik tunisillutillu pisisinnaavutit, taamaalillutit nammineerlutit aalisarnerit illit aalisarsinnaaninnut tulluarsarsinnaavat.

Ukiut tamaasa Naalakkersuisut PNNP-inik aalisarnernut ukiumut akuerisaasumik pisarineqarsinnaasut (TAC) aalajangersartarpaat. Aqutsiveqarfinni ataasiakkaani tamani Qeqertarsuup Tunuani, Upernavimmi Uummannamilu pisassiissutit tamarmiusut (TAC) aalajangersarneqartarput.Pisassiissutinit nammineq pigisatit tunngavigalugit tonsit qassit pisarisinnaaneritit naatsorsorneqartarput (ukiumut pisassat). Pisassiissutit ilaannik pigisaqarneq malillugu pisassiissutinik pigisaqartunut assigiinngitsunut agguaasoqartarpoq. Pisassiissutinik nammineq pigisaqaruit atuisinnaatitaaffeqarputit, tassa imaappoq ukiumut pisassiissutinik ilinnut tunniunneqartunik atuisinnaaneq.

Eqqumaffigissavattaaq atuisussaatitaagavit, tamanna isumaqarpoq minnerpaamik pisassavit 75%-ii ukiut tamaasa aalisartassagitit. 25%-it sinneruttut ukiup tullianut nuussinnaavatit imaluunniit ukiumut pisassavit annerpaamik 10%-ii aalisartumut allamut ukiup naannginnerani tamakkerlugit aalisarsinnaasumut tunillugit. Ukiumut pisassat tunigukkit ukiup tulliani pisassanik agguaassinermut malunnaateqarnavianngillat, pisassiissutit pigisat atorlugit ukiumut pisassatit aalajangersarneqartarmata.

Tamatuma saniatigut ukiumut pisassatit tamakkerlugit aalisarsimagukkit ukiup tulliani pisassanut siumoorisinnaavutit. Pingaaruteqarporli nalussannginnakku siumooralutit aalisakkatit ukiup tulliani pisassanniik ilanngaatigineqassammata.

Periarfissaavortaaq pisassiissutit pigisavit tamakkerlugit ilaannaaluunniit tunisinnaaneri – aammalu ukiumut pisassavit annerpaamik 10%-ii ukiup iluani tunisinnaaneri. Nammineerlutillu pisassiissutinik allat pigisaanik ukiumulluunniit pisassanik pisisinnaavutit.

Pisassiissutinik pigisanik pisineq tunisinerlu
Pisassiissutit pigisat tassaapput pisassat tamakkiisut ilaat procentinngukkat. Assersuutigalugu pisassat tamakkiisut 2%-iat pisassiissutit pigisanngorlugit pisiarisinnaavat. Pisassiissutit pigisappit ukiut tamaasa pisassat tamakkiisut ilaanik aaliangersimasumik peqarnissannut pisussaaffilersittarpaatit. Taanna annertussuseq ukiumut aalisarsinnaavat. Pisassiissutit pigisatit tamakkerlugit ilaannaaluunniit tuninissaannut periarfissaqarputit. Pisassiissutit pigisatit tunigukkit tunisinerit allanngortinneqarsinnaanngilaq. Pisassiissutit pigisatit tamakkerlugit tunigukkit aalisarnissannut periarfissaarutissaatit. Pisassiissutit pigisavit ilaannai tunigukkit annikinnerusumik aalisarsinnaalissaatit. Annertunerusumik pisassiissutinik pigisaqalerusukkuit aalisartunit allanit pisassiissutinik pigisaminnik tuniserusuttuniik pisisinnaavutit. Pisassiissutinik pigisanik pisiguit ukiumut pisassat aaliangersimasut ilanngullugit pisiarissavatit.

Ukiumut pisassanik pisineq tunisinerlu
Ukiumut pisassat tassaapput ukiumi matumani pisassiissutit pigisatit tunngavigalugit pisassat tonsinngorlugu pisartakkat. Taanna annertussuseq ukiumiit ukiumut nikerartarpoq imartami tassani pisassiissutit tamakkiisut allanngorpata. Assersuutigalugu pisassiissutit pigisatit pisassiissutit tamakkiisut 2%-erippagit, taanna annertussuseq ukiumi matumani pisassani qalerallit 200 tonsiusinnaapput. Taanna annertussuseq pisiarisinnaavattaaq tunilluguluunniit. Ukiumut pisassanik pisineq tunisinerlu ukiumi pineqartumiinnaq atuuttarpoq, taamaattumik ataavartuunngilaq. Ukiumut pisassavit 10%-ia sinnerlugu tunisinnaanngilat.

Ukiumut pisassanik pisiniaruit nammineerlutit pisassiissutinik pigisaqareersimassaatit, taamatuttaaq aalisarnermut akuersissuteqareersimassallutit. Assersuutigalugu pisassiissutit pigisanniik annertunerusumik aalisarsinnaaguit ukiumut pisassanik pisisinnaavutit, imaluunniit assersuutitut umiiarneq peqqutaalluni pisassatit tamakkerlugit aalisarsinnaanngikkukkit ukiumut pisassappit ilaai tunisinnaavatit.
Pisassiissutit pigisatit qularnaveequteqarpatta piumasaqaataavoq qularnaveeqqusisuminngaanniit (ass. aningaaserivimminngaanniit) pisineq akuerineqaqqaassasoq.

Ukiumut pisassanik pisassiissutinilluunniit pigisanik pisiniaruit tuniniaasut pisarisat inissisimaffiata allattorsimaffiani nanisinnaavatit. Pisarisat inissisimaffiata allattorsimaffiat tassaavoq pisassat aalisarneqarsimanngitsut nalunaarsuiffiat.

Kalaallit Nunaanni Aalisarnermut Piniarnermullu Nakkutilliisoqarfimmut (KANUAPNA-mut) saaffiginninnikkut nalunaarsuiffik ilinnut nassiutsissinnaavat: gfjk@nanoq.gl

Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit.

Pisassiissutit ilaannik pisiniaruit piumasaqaatit pisussaaffiillu tullinnguuttut tamaasa naammassisimassavatit:

• Ingerlatseqatigiiffiuteqaruit taannalu aktiaateqarluni ingerlatseqatigiiffiussaaq, piginneqataassuteqarluni ingerlatseqatigiiffiussaaq, piginneqatigiiffiussaaq, soqutigisaqaqatigiilluni ingerlatseqatigiiffik imaluunniit piginneqatigiilluni umiarsuaatileqatigiiffiussalluni.
• Kalaallit Nunaanni nalunaarsorsimasumik angallataateqassaatit. Aalisarsinnaanermut akuersissummik tigusaqaruit angallatip akuersissutaatinnut ilanngunnissaanut qaammatinik 18-inik piffissaqarputit.
• Angallatit søfartstyrelse-p angallatinik allattorsimaffiani nalunaarsorneqarsimassaaq.
• Kalaallit Nunaanni najugaqartutut inuit nalunaarsorsimaffianni nalunaarsorsimassaatit, Kalaallit Nunaannilu inuit aqqisa nalunaarsorsimaffianni ukiuni kingullerni 5-ini amerlanerusuniluunniit nalunaarsorsimassallutit.
• Kalaallit Nunaanni tamakkiisumik akileraartartuussaatit ukiullu siuliini 5-ini amerlanerusuniluunniit Kalaallit Nunaanni akileraartartuusimassallutit.

Ingerlatseqatigiiffinnut aalisarnermi pisassiissutit ilaannik piserusuttunut piumasaqaatit:

• Ingerlatseqatigiiffiup aningaasaataasa minnerpaamik 2/3-lii inunnit ataasiakkaanit toqqaannartumik imaluunniit toqqaannanngitsumik pigineqassapput, taannalu
• Kalaallinut inuiaqatigiinnut aalajangersimasumik attuumassuteqassaaq (piginnittuunermut uppernarsaat aamma inuit allattorsimaffiat)
• Kalaallit Nunaanni inuit nalunaarsorsimaffianni allanneqarsimallutik najugaqartunit Kalaallit Nunaannilu inuit nalunaarsorsimaffianni allanneqarsimallutik ukiuni siuliini marlunni najugaqarsimasunit,
• Ukiuni qaammatisiuteqarfiusuni marlunni siuliini Kalaallit Nunaanni tamakkiisumik akileraartussaatitaasimassaaq

Pisassiissutit pigisinnaasappit annerpaaffissai:

• Kitaani raajarniarnermi pisassat tamakkiisut 20%-iinik annertunerusunik pisassiissutinik pigisaqarsinnaanngilatit.
• Tunumi raajarniarnermi pisassat tamakkiisut 33%-iinik annertunerusunik pisassiissutinik pigisaqarsinnaanngilatit.
• Kitaani raajarniarlutillu qaleralinniaruit aalisarnerni taakkunani pisassat kattullugit 20%-iinik annertunerusunik pisassiissutinik pigisaqarsinnaanngilatit.
• Aqutsiveqarfinni tamani assagiarsunniarnerni pisassat tamakkiisut 15%-iinik annertunerusunik pisassiissutinik pigisaqarsinnaanngilatit.
• Aqutsiveqarfinni Qeqertarsuup tunuani, Upernavimmi Uummannamilu qaleralinniarnermi pisassat tamakkiisut 2,5%-iinik annertunerusunik pisassiissutinik pigisaqarsinnaanngilatit.

Kitaani raajanut assagiarsunnulluunniit pisassat 12,5%-iisa sinerissallu qanittuani Qeqertarsuup tunuani, Upernavimmi Uummannamilu qalerallilt 2,5%-iisa illit illillu ilaquttatit qaninnerit; nuliat, uiit, angajoqqaatit, meeqqatit qatanngutitilluunniit ataatsimut toqqaannartumik toqqaannanngitsumilluunniit ingerlatseqatigiiffiit aqqutigalugit pisassat pigisinnaanngilasi. Soraarnerussutisianut ingerlatseqatigiiffiit aqutigalugit pisassiissutinik pigisaqaruit pisassanik inuup tamakkiisumik pigisaata naatsorsornerinut ilaassanngillat.

MitID atorneqarsinnaanngilaq.

Pisassiissutit niuerutigineqarsinnaasut nammineq pigisanik pisiniaruit tunisiniaruilluunniit, niueqatigiinnermi isumaqatigiissut pisisumit tunisisumillu immersugassaq immersorneqarsimassaaq.
Tunisup pisisullu aqqi aalisarsinnaanermullu akuersissutaasa normui/CVR normuilu ilanngunneqassapput.

Pisassiissutit niuerutigineqarsinnaasut nammineq pigisatit qularnaveeqquserneqarsimanersut aamma ilisimatitsissutigissavat. Pisassiissutit niuerutigineqarsinnaasut nammineq pigisat qularnaveeqquserneqarsimappata qularnaveeqqusiisumit akuersinermut uppernarsaat ilanngutissavat.

Una toorlugu sinerissap qanittuani qaleralinniarnermi inunnut ataasiakkaanut pisassiissutit niuerutigineqarsinnaasunik pisineq tunisinerlu pillugit isumaqatigiissutip aajuk

Pisinermut isumaqatigiissut e-mailikkut Aalisarnermut, Piniarnermut, Nunalerinermut Imminut Pilersornermullu Naalakkersuisoqarfimmut akuerisassanngorlugu nassiutissavat.

Raajanut avataasiorlunilu qaleralinniarnermut: apn@nanoq.gl
Assagiarsunnut sinerissallu qanittuani qaleralinniarnermut: aalisa@nanoq.gl

Aalisarnermut, Piniarnermut, Nunalerinermut Imminut Pilersornermullu Naalakkersuisoqarfiup pisineq tunisinerlu pillugit isumaqatigiissutigisat e-mailikkut tiguppagu, aalisarnermut immikkoortortaqarfimmi sulianik sullissisumut eqqortumut ingerlateqqinneqassaaq.
Qinnuteqaativit tiguneqarsimaneranik uppernarsaammik e-mailikkut tigusaqassaatit.
Suliap suliarineqarnera ullunik suliffiusunik qulinik sivisussuseqarsinnaavoq.
Naalakkersuisoqarfiup pisinermut tunisinermullu piumasaqaatit naammassisimaneritit misissussavai.

Qinnuteqaatit akuerineqarsimanersoq itigartinneqarsimanersorluunniit pillugu akissut mailimut pisineq tunisinerlu pillugit isumaqatigiissummik nassiussissutigisannut nassiunneqassaaq.
Niueqatigiinneq Naalakkersuisoqarfiup akuerippagu aalisarsinnaanermut akuersissutinik nutaanik pisassiissutitallit tigussavatit.

Pissutsit atugarisatit pillugit paasissutissat allanngorpata Aalisarnermut, Piniarnermut, Nunalerinermut Imminut Pilersornermullu Naalakkersuisoqarfimmut ilisimatitsisussaatitaavutit. Assersuutaasinnaapput ingerlatseqatigiiffiutit angallataatilluunniit pillugit allannguinerit.

Allannguinerit pillugit tigusaqartoqariarpat nutaamik akuersissusiunneqassaatit, tassanilu paasissutissat nutaat ilaatinneqassapput.

Inuussutissarsiutigalugu aalisartutut paasissutissat eqqortuunissaannut akisussaaffeqarputit.

Pisassiissutit niuerutigineqarsinnaasut nammineq pigisat ukiumullu pisassiissutit amerlassusaannik pisinissamut tunisinissamut akuerineqarnissamut ukioq naallugu qinnuteqarsinnaavutit.

Aalisarnermut Piniarnermullu Naalakkersuisoqarfiup aalajangiinerta maalaarutigineqarsinnaanera periarfissaanngilaq.