Aanngajaarniutinik aningaasanoornermillu ajornartorsiuteqarnermut katsorsartinneq

Makku arlaannik ajornartorsiuteqaruit katsorsartissinnaavutit:

• Imigassaq
• Hashi
• Aningaasanoorneq

Ikiorserneqassaguit immersugassaq internettikkut immersussavat (MitID pisariaqarpoq), imaluunniit kommunerisanni nunaqarfiulluunniit allaffiani sullissisunnut internettikkut immersuinissannut ikiorneqaqqullutit saaffiginnissinnaavutit (MitID aamma pisariaqarpoq).

Illoqarfinni tamani 2025-mi katsorsartinnissamut neqerooruteqartoqartarpoq, 2026-miilli illoqarfiit ilaannaani, aamma internetti iluaqutigalugu innuttaasunut katsorsaanermik neqerooruteqartarpoq Katsorsaavik Nuuk suleqatigalugu.

Ikiorneqarsinnaavutit:

• Aanngajaarniutinik imaluunniit aningaasanoornermik ajornartorsiuteqaruit katsorsartinnissamillu kissaateqaruit
• Ilaquttavit arlaat aanngajaarniutinik aningaasanoornermilluunniit ajornartorsiuteqarpat

Katsorsartinnermi

Aanngajaarniummik aningaasanoornermilluunniit ajornartorsiuteqarninnut katsorsartinnissamut innersuunneqaruit katsorsartinnissat akeqassanngilaq. Nuummi katsorsartissaguit angalaneq ineqarnerlu Allorfik - Pinngitsuuisinnaajunnaarnermik Paasisimasaqarfiup akilissavai. Najukkanni kommunip iluani katsorsartissaguit kommunip angalaneq ineqarnerlu akilissavai.

Qanigisat katsorsartinneranni
Katsorsartittut tamarmik qanigisaat katsorsarneqarsinnaapput. Ilaquttavit ilaquttatut katsorsartinnissaq kissaatigippassuk, illillu illoqarfigisavit avataani tamanna ingerlanneqassappat, ilaquttavit angalanerat ineqarnerallu kommunip akilissavai.

Katsorsaanissat ilaanni utaqqisoqarsinnaavoq.

Katsorsartikkusukkuit ima iliorsinnaavutit:

• Immersugassaq internettikkut immersoriarlugu nassiussavat (MitID pisariaqarpoq)

Immersuinerni ikiorneqarnissannut pisariaqartitsiguit ukua attavigisinnaavatit:

• Kommunerisanni sullissisut
• Allorfik, tlf.: 34 14 51

Ilisimassavat innersuunneqarlutit immersuininni aperineqarumaaravit inuttut atukkanni imaluunniit suliffeqarninnut tunngasuni ikiorneqarnissannut pisariaqartitsinersutit, imaluunniit ineqarniarnikkut ajornartorsiuteqarnersutit.

Allorfiup immersukkat tiguguniuk Allorfimmi sulisumit attavigineqassaatit, tamannalu kinguneqartussaassaaq ilinnut naleqquttumik katsorsaanissamik neqeroorfigineqarnernik.

Inissaqaleriarpat katsorsarneqarnissannut neqeroorfigineqassaatit, tamannalu ullut 14-init ingerlaneranni pikkajuttarpoq.