Illut sanaqataaffiusut

Illu sanaqataaffiusoq tassaavoq illu aalajangersimasoq akuerisaq. Piffissami matumani Illorput 2100 akuerisaavoq.
Illu sanaqaassiusussatut katiteriaannartut tunniunneqartarpoq, sumiiffimmilu sananeqartarluni. Aammalu taarsigassarsisoq/sanaqataasoq suleqatigalugu sanasut ilinniarsimasut ikiortigalugit illu sananeqassaaq.

Qinnuteqaatit sanaartornissamut imaluunniit pissarsinissamut taarsigassarsisitsinissami qinnuteqaat, allakkatigoortumik kommune-mut nassiunneqasaaq.

Kommune taarsigassarsisitsisinnavoq allakkatigut uppernarsarnikunik kuuffissuarnullu attavilernissamut, pilersaarusiornissamut toqqammavissamullu sanaartornissamut, sanaartornermi ikiorteqartussaanermik ilitsersuisumiillu ikiorserneqarnissamut, innaallagissap aqqutaanik, erngup aqqutaannut kiassarnillu ikkussuunneqarnissaa pisortallu tamakkua ikkussorneqarnissaannut piumasaqaatigisaannut pillugit.

Illunut sanaqataaffiusunut inatsit malillugu, illumik sanaqataaffiusumik sananissamut imaluunniit tigusinissamut taarsigassarsinissamik kommunimut qinnuteqarsinnaavutit.
Taamaattoq Ilulissani, Aasianni, Sisimiuni, Nuummi imaluunniit Qaqortumi najugaqaruit tamanna periarfissaanngilaq. Kommuni illumik sanaqataaffiusumik nutaamik sananissamut, kisianni aamma illumik sanaqataaffiusumik sananeqareersumik tigusinissamut, tamatumalu saniatigut illunik sanaqataaffiusunik naammassineqanngitsunut taarsigassarsititsisinnaavoq.

Qinnuteqqaat kommuneqarfigisamut nassiunneqassaaq.

Illumik sanaqataaffiusumik sanaartornissamut imaluunniit pissarsinissamut taarsigassarsiffiusinnaallutik aningaasartuutissanut tamanut kommunalbestyrelsi taarsigassarsisitsisinnaavoq. Taamaattoq taarsigassarsisup nammineq akiliutissai 25.000 koruuniusut ilanngaatigineqassapput.

Kommunip taarsigassarsiissutigisaat ukiuni 20-ni amerlaqatigiinnik akilersugassanngorlugit taarsigassarsiissutigineqassapput Nationalbankip diskonto inissitaa kiisalu erniarititaq 3%-pointimik ilallugu taarsigassarsiissutigineqartut ernialersorneqassapput. Taarsigassarsiissutit ukiunut taarsersorneqarfissaannut tamarmiusunut erniarititassaq, illup sanaqataaffiusup atulernissaanut akuersissutip ulluanit aalajangersarneqassaaq.
Taarsigassarsiissutit ernialersorneqassapput, qaammatillu tamaasa aalajangersimasumik akiliuteqartarnikkut akilersorneqassallutik, qaammammut qaangiuttumut qaammatit aallartinnerini ullormi siullermi akilerneqartarlutik.
Taarsigassarsianut siullermeertumik akiliutigineqartussaq, illumut sanaqataaffiusumut atuilernissamik akuersissutip tunniunneranit ukiumi tulliuttumi februaarip aallaqqaataani siullermeertumik akilerneqassaaq.

Taarsigassarsisup, taassumalu inoqutaasa piffissami pineqartumi isertitaat tamarmiusut ukiut tamaasa januaarip aallaqqaataani naatsorsorneqartut tunngavigalugit, qaammatini tulliuttuni aqqaneq-marluusuni qaammammut akiliutigineqartartussaq naatsorsorneqassaaq. Siullermeertumik illumut sanaqataaffiusumut atuilernissamik akuersissutip tunniunneranit ukiumi tulliuttumi januaarip aallaqqaataani.

ASSERSUUT: inatsisip oqaaseqaataaneersoq, MALUGIUK diskonto, rentip kisitsisaa allanngorsinnaammat.

Taarsigassarsisup akiliutigisartagai, kommunip kingusinnerusukkut illunik sanaqataaffiusunik nutarterinissamut taarsigassarsisitsinissaanut imaluunniit tapiissuteqarnissaanut toqqortaatigineqassapput.

Akilersuutinullu akiliutit illut sanaqataaffiusut pilersaarutaasumik aserfallatsaalineqarnissaannut, nutarterneqarnissaannullu taarsigassarsiissutissatut imaluunniit tapiissutissatut taamaallaat atorsinnaavai.

Taarsigassarsiat
100.000 koruunit tikillugit taarsigassarsisitsisoqarsinnaavoq. Nutarterinissamut taarsigassarsiissutigineqarsimasut akilersimatinnagit, nutarterinissami suliassat nutaat aningaasalersorneqarnissaannut nutaamik, tapertaliussamilluunniit taarsigassarsisitsisoqarsinnaanngilaq. Nutarterinissami taarsigassarsiat tamakkerlugit akilerneqarpata, nutarterinissamut nutaamik taarsigassarsisitsisoqarsinnaavoq.

Tapersiineq
Taarsigassarsitinneqarnissaminnik qinnuteqartut inoqutigiittut piffissami pineqartumi isertitaat tamarmiusut 300.000 koruunit sinnernagit isertitaqartunut taamaallaat nutarterinissamut tapiissuteqartoqarsinnaavoq. Taamaalilluni aserfallatsaaliinissamut pisariaqartumik sipaaruteqarnissaminnut ajornartorsiuteqartutut isigineqarsinnaasut kisimik, tapiiffigineqarnissaminnik qinnuteqarsinnaanissaat pingaartinneqarpoq.

Kommuni aamma pingaarnersiuissaaq, taamaalilluni sumiiffinni pisortat illuutaannik attartortakkanik inoqanngitsoqareersuni imaluunniit illunik sanaqataaffiusunik imaluunniit nammineq illulianik
najorneqanngitsunik inissianik pisariaqartitsinermik naammassinniffiusinnaasuni, illunik sanaqataaffiusunik sananissamut taarsigassarsititsisoqarsinnaanani.

Kommunip taarsigassarsiat illup qularnaveeqqusiunneratigut isumannaassavai.

Illu najugaqarfissatut siunertaqarmat, inuussutissarsiutinik ingerlatsivittut atorneqaqqusaanngilaq. Kisiannili inuussutissarsiutit iluanaarnannginnerusut akuerineqarsinnaapput, inissiat annersaa najugaqarfittut atorneqarluni, soorlu inissiami ini ataaseq ulluunerani paaqqinniffittut isikkanilluunniit passussivittut atorneqarpat.

Taarsigassarsititsinissamik neriorsuutip tunniunneqareernerata kingorna ukiut marluk qaangiutsinnagit illu naammassillugu sananeqareersimallunilu atorneqalereersimassaaq, taamaanngippat
taarsigassasititsinissamik neriorsuut atorunnaarsinneqassaaq. Illunik ilaannakortumik sanaartortoqarnissaa pinaveersaartinniarlugu taamaaliortoqarpoq.

Piginnittussaatitaaneq inaarutaasumik qularnaveeqqusiussaqarluni taarsigassarsititsinermut uppernarsaat tunniunneqareerpat aatsaat kommunimit qinnuteqartumut nuutinneqassaaq.

Illumi sanaqataaffiusumi najugaqartussaatitaaneq atuuppoq. Tassa ukiumut minnerpaamik ulluni 180-ini illu najugaqarfigissavat.

Maluginiaruk pisortanut akiligassatit 25.000 kr. sinnerpagit, illunik sanaqataaffiusunut taarsigassarsisinnaannginnavit.

Taarsigassarsinissamut qinnuteqaat kommunimut nassiunneqassaaq.

Qinnuteqaammi ilanngunneqassapput:

1. Illumut sanaqataaffiusumut kissaatigineqartumut nassuiaat
2. Nunaminertamik qinnuteqarnerup assilinera
3. Nammineq aningaasalersuinerup pissarsiarineqarsinnaaneranut uppernarsaat
4. Pilersaarutaasumik piffissakkaartumillu aserfallatsaaliinissamut akiliisinnaanermut uppernarsaat
5. CPR-normut aammalu najugaqarnermut allagartaq

Kommunip suliassamik suliarinninneq isumagissavaa, ilaatigut tassaallutik sanaartornermi atortussanik neqeroorummik, sanasunit neqeroorummik piniarneq aamma sananermi aningaasartuutissat tamakkiisut missingersuusiorneri, kiisalu ingerlatsinermut missingersuutit.

Missingersuut akuerissavat, tamatumalu kingorna taarsigassarsititsinissamik neriorsuut pillugu kommunimit attavigineqassaatit.

Illunut sanaqataaffiusunut inatsimmi nutaatut ilanngunneqarpoq, sumiiffinni nunalerinermut atugassiaasuni illunik sanaqataaffiusunik sanaartornissamut, pissarsinissamulluunniit taarsigassarsisitsisoqarsinnaavoq.

Illit nunalerinermut akuersissummik piginnittutut, imaluunnit ingerlatsinermik isumaginnittunit qinnuteqarsinnaaneq , illunik sanaqataaffiusunik sanaartornissamut imaluunniit pissarsinissamut. Piumasaqaataavoq illu sanaqataaffiusup najugaqarfittut atorneqarnissaa.

Nunalerinermik ingerlatsisinnaanermut akuersissut ingerlatseqatigiiffimmut tunniunneqarsimappat, ingerlatseqatigiiffimmi kina ingerlatsinermik ingerlatsisinnaanersoq nunalerinermut inatsimmi atuuttummi allassimavoq.

Nunataq/sumiiffimik nunalerinermut siunertanut immikkoortinneqarsimanersoq kommunimi pilersaarummi atuuttumi allassimasarpoq.

Qinnuteqarnissamut piumasaqaatit naliginnaasut atuupput. Qinnuteqaat kommunimut nassiunneqassaaq.